Ní raibh an caisleán ann níos mó. Ní raibh seomra ar bith lán le troscán, le seoda ná le dealbha órga. Ar an bplásóg lasmuigh den phálás ríoga, bhí an slua a tháinig go dtí cóisir an phrionsa ina seasamh thart. Bhí an Prionsa Antinous ann freisin ach ní raibh éadaí breátha air níos mó. Bhí a chairde agus a ghiollaí ag féachaint air agus é ar crith leis an bhfuacht agus an náire. Ní raibh air anois ach a bhrístíní.
Ba bheag nach raibh trua ag Chloe dó, go dtí gur scairt sé amach go feargach.
‘Faighigí an leabhar sin dom!’
Bhog cúpla duine i dtreo an dragúin go cúramach. Ach sheas seisean in airde ar a chosa deiridh, bhuail sé an t-aer lena sciatháin, agus lig sé búir chomh fíochmhar gur chúlaigh siad go tapaidh. Chaith na daoine a bhí in aice leis an dragún iad féin síos ar an talamh.
‘Má thagann sibh in aice liom chun an leabhar a sciobadh,’ a bhéic sé, ‘róstfaidh mé sibh le m’anáil tine agus ansin íosfaidh mé sibh.’ Ligh sé a bheola lena theanga fhada bhándearg. B’fhéidir gur mhaith leis duine éigin a róstadh lena anáil. Ach níor bhog duine ar bith.
![](/assets/Home-68162fc7cdb903df61529e1dd4ccd844fb348a742d4411ac085180fdbde18665.png)
![](https://leighleat.com/rails/active_storage/blobs/redirect/eyJfcmFpbHMiOnsibWVzc2FnZSI6IkJBaHBBcEVXIiwiZXhwIjpudWxsLCJwdXIiOiJibG9iX2lkIn19--23a646ad7cc7c54384622bb9c37f8089ecb5b11f/Lch_35_-_37.png)