‘Ní hea, a mh’anam,’ arsa Sean-Úna.
‘Na daoine a chuala an ceol ó bhéal na Maighdine féin anseo sa taobh tíre seo ní i bhfad ó shin.’
‘Ach cén chaoi a bhféadfadh siad é a chloisteáil?’
‘Nach bhfuil a fhios ag an saol go dtéann an Mhaighdean ghlórmhar thart timpeall na mbailte chuile Oíche Nollag, í féin agus a Leanbh?’
‘Chuala mé na daoine a rá go dtéann.’
‘Agus nach bhfuil a fhios agat, má fhágtar an doras ar oscailt agus coinneal ar lasadh sa bhfuinneog, go dtiocfaidh an Mhaighdean agus a Leanbh isteach sa teach agus go suífidh siad lena scíth a ligean?’
‘M’anam go gcuala mé é sin freisin.’