'Ag brionglóidigh mar is gnách leat, a Eoghainín?'
'Ní hea, a Athair. Tá mé ag caint leis na fáinleoga.'
'Ag caint leo?'
''Sea, a Athair. Bímid ag caint le chéile i gcónaí.'
'Agus cogar. Céard a bhíos sibh a rá le chéile?'
'Bímid ag caint ar na críocha i bhfad uainn a mbíonn sé ina shamhradh i gcónaí iontu, agus ar na farraigí fiáine san áit a mbáitear na loingis, agus ar na cathracha aolgheala a gcónaíonn na ríthe iontu.'
Tháinig ionadh a chroí ar an sagart mar a tháinig ar an máthair roimhe sin.
'Tusa a bhíos ag cur síos ar na nithe seo agus iadsan ag éisteacht leat, is cosúil?'
'Ní mé, a Athair. Iadsan is mó a bhíos ag caint agus mise ag éisteacht leo.'
'Agus an dtuigeann tú a gcuid cainte, a Eoghainín?'
'Tuigim, a Athair. Nach dtuigeann tusa í?'
'Ní go rómhaith a thuigim í. Déan áit dom ar an aill ansin agus suífidh mé tamall go míní tú dhom céard a bhíos siad a rá.'
Suas leis an sagart ar an aill agus shuigh le hais an ghasúirín. Chuir sé a lámh faoina mhuineál is thosaigh ag baint cainte as.